Review :

"கருப்பு பல்சர்" முரளி கிரிஷ் இயக்கத்தில் யாஷோஎன்டேர்டைமன்ட் தயாரிப்பில் உருவாகியிருக்கும் இந்த படத்திற்கு இசை இன்பா. இந்த படத்தில் அட்ட கத்தி தினேஷ்,ரேஷ்மா வெங்கடேஷ், மன்சூர் அலிகான்,சரவணா மற்றும் பலர் நடித்துள்ளனர்.  

மதுரையைச் சேர்ந்த பைனான்ஸ் தொழில் செய்யும் ஆர்ஜை, ஒரு பயங்கர கனவால் அடிக்கடி கலங்குகிறார். கருப்பு நிற பல்சர் பைக் விபத்தில் சிக்கி, ஜல்லிக்கட்டு காளை மோதுவது போல அந்த கனவு அவரை தொடர்ந்து துரத்துகிறது. இதன் காரணமாக, அவர் வைத்திருக்கும் கருப்பு பல்சர் பைக்கை, தன்னிடம் கடன் பெற்ற தண்ணீர் கேன் வியாபாரி மன்சூர் அலி கானிடம் ஒப்படைக்கச் சொல்கிறார்.

அந்த கருப்பு பல்சர் யார் கைக்கு சென்றாலும், அதில் காதல் ஜோடியாக பயணம் செய்தால் விபத்து நடக்கும் என்ற ஒரு அச்ச உணர்வு கதையில் உருவாக்கப்படுகிறது. இதற்கிடையில், வாட்டர் ஃபில்டர் நிறுவனத்தில் வேலை செய்யும் தினேஷை, தனது வியாபாரத்திற்கு எதிரியாக நினைக்கும் மன்சூர், அவரை தீர்த்துக் கட்ட திட்டம் தீட்டுகிறார்.

அதே சமயம், தினேஷின் காதலி ரேஷ்மா, அந்த கருப்பு பல்சரில் தன்னை அழைத்துச் செல்ல வேண்டும் எனக் கேட்கிறார். இதனால் தினேஷ், மன்சூரிடம் இருந்து அந்த பைக்கை வாங்கிக் கொள்கிறார். அந்த பைக்கில் சென்றால் தினேஷ் உயிரோடு இருக்க மாட்டார் என்று நம்பும் மன்சூர், மகிழ்ச்சியுடன் பைக்கை அவரிடம் ஒப்படைக்கிறார். ஆனால் தினேஷ் உயிர் தப்பினாரா? ஆர்ஜையை துரத்தும் கனவுக்கும், அந்த கருப்பு பல்சர் பைக்கும், ஜல்லிக்கட்டு காளைக்கும் என்ன தொடர்பு உள்ளது என்பதே 'கருப்புபல்சர்' படத்தின் கதை.

இந்த படத்தில் தினேஷுக்கு வயதுக்கு ஏற்ற, சுறுசுறுப்பான வேடம். அவர் வழக்கமான இயல்பான நடிப்பை வழங்கியிருக்கிறார். ஜல்லிக்கட்டு வீரராக அவர் தோன்றுவது கதைக்கு கூடுதல் பலம் சேர்க்கிறது. நாயகிகளாக ரேஷ்மா வெங்கடேஷ் மற்றும் மதுனிகா நடித்திருந்தாலும், பாத்திர அமைப்பில் மதுனிகா சற்றே முன்னிலையில் நிற்கிறார்.

மன்சூர் அலி கான் தோன்றும் காட்சிகளில், அவர் அடிக்கடி அசைவ உணவை வெட்டிக் கொண்டிருப்பது கதாபாத்திரத்திற்கு ஒரு தனித்துவமான அடையாளமாக அமைக்கப்பட்டுள்ளது. கதையின் முடிச்சை அவிழ்க்க சரவண சுப்பையாவின் பங்கு உதவியாக உள்ளது. பிராங்க் ஸ்டார் ராகுல் சில இடங்களில் சிரிப்பையும் ரசனையையும் கூட்டுகிறார்.

பாஸ்கர் ஆறுமுகத்தின் ஒளிப்பதிவு, குறைந்த செலவில் படத்தை அழகாக காட்டுகிறது. இசையமைப்பாளர் இன்பா, பாடல்களையும் தானே எழுதி தனது வருகையை கவனிக்க வைக்கிறார்.

கதை, வசனம், இயக்கம் என மூன்றையும் கவனித்திருக்கும் முரளி கிரிஷ். எஸ், ஒரு வணிக ரீதியான கதைக்குள் பயம், சஸ்பென்ஸ் மற்றும் சமூக கருத்துகளை கலந்து சொல்ல முயன்றிருப்பது பாராட்டத்தக்கது.

"கருப்பு பல்சர்" படத்திற்கு மதிப்பீடு 3/5

Verdict : ஹாரர், சஸ்பென்ஸ், சமூக கருத்துகள் கலந்து உருவான கமர்ஷியல் படம்