Review :

காஷ்மீரில் நடக்கவிருந்த ஒரு பெரிய மதக்கலவரத்தைத் தன் புத்திசாலித்தனத்தால் தடுத்து நிறுத்துகிறார் இந்திய இராணுவ வீரரான துல்கர்சல்மான் மற்றும் அவரது குழுவினர். இதனால் நாடெங்கும் பிரபலமடைந்த துல்கர்சல்மானையம் அவரது குழுவினரையும் பேட்டி எடுக்கிறது வானொலி. அந்த பேட்டியின் மற்றவர்கள் தங்களது குடும்பத்தாரிடம் பேச  துல்கர்சல்மானோ தனக்கு யாரும் இல்லையென்றும் தான் ஒரு அனாதை என்றும் கூறுகிறார். அன்றிலிருந்து அவருக்கு ஆயிரக்கணக்கான கடிதங்கள் வரத்தொடங்குகின்றன. அதில் ஒரு விலாசம் இல்லாத கடிதத்தில் நான் உங்கள் மனைவி சீதாமகாலட்சுமி என்று குறிப்பிட்டு இருக்க அந்த கடிதம் வாயிலாக வழிந்த காதலால் ஈர்க்கப்பட்டு துல்கர்சல்மான், அந்த முகவரியில் உள்ள சீதாமகாலட்சுமியை தேடி செல்கிறார். அனுப்புநர் கடிதத்தில் உள்ள அஞ்சல் முத்திரையை வைத்துகொண்டு அனுப்பியவர் யார் எனத் தேடி செல்லும் துல்கர் சல்மான் அவரை சந்தித்தாரா ? சீதா மகாலட்சுமி யார்? இவர்கள் காதல் கைகூடுமா என்பதுதான் "சீதா ராமம்" படத்தின் கதை. 

ராணுவ வீரராக நடித்திருக்கும் துல்கர் சல்மான், ராணுவ வீரருக்கான கம்பீர தோற்றத்தோடு நடிக்கும் போதும் சரி உருகி உருகி காதல் செய்யும் காட்சிகளில் சரி துல்கர் சல்மான் போல் யாராலும் பொருந்தி நடிக்க முடியாது, என்று சொல்லும் அளவுக்கு துல்கர் சல்மாநடித்திருக்கிறார். 

சீதாமகாலட்சுமியாக நடித்திருக்கும் மிருணாள் தாகூர், அழகான முகத்தோடு, அமைதியான நடிப்பை வெளிப்படுத்தி அசத்துகிறார். 

ராணுவ அதிகாரிகளாக நடித்திருக்கும் பிரகாஷ்ராஜ், கெளதம் வாசுதேவ் மேனன், சுமந்த், ராஷ்மிகாவின் நண்பராக நடித்திருக்கும் தருண் பாஸ்கர், வெண்ணிலா கிஷோர் என படத்தில் நடித்திருக்கும் அனைத்து நடிகர்களும் அவர் அவர் வேலையை சரியாக செய்திருக்கிறார்கள்.

ஒளிப்பதிவாளர்கள் பி.எஸ்.வினோத் மற்றும் ஸ்ரேயாஸ் கிருஷ்ணன் காஷ்மீரின் அழகில் நம்மை மூழ்கடிப்பதோடு, கதாப்பாத்திரங்களையும் மிக அழகாக காட்டியிருக்கிறார்கள். படத்தில் இடம்பெறும் லொக்கேஷன்களையும், பாடல் காட்சிகளையும் பிரம்மாண்டமாக காட்சிப்படுத்தியிருப்பதோடு, காதலர்களின் உணர்வுகளோடு, ராணுவ வீரர்களின் வலிகளையும் நம்முள் கடத்தியிருப்பது பாராட்டுக்குரியது.

ராஷ்மிகாவுடன் பயணப்படும் தருண்பாஸ்கர், துல்கரின் நண்பராக வரும் வெண்ணிலாகிஷோர், இராணுவ அதிகாரிகளாக வரும் கெளதம்மேனன், பிரகாஷ்ராஜ், சுமந்த் உள்ளிட்டு படத்தில் இருக்கும் அனைவரும் தத்தம் கதாபாத்திரங்களைச் சரியாகச் செய்து படத்துக்கு உதவியிருக்கிறார்கள்.

விஷால் சந்திரசேகரின் இசையில் பாடல்கள் அனைத்தும் உருக வைக்கிறது. மதன் கார்கியின் ஒவ்வொரு வரிகளும் நம்முள் காதல் உணர்வுகளை தட்டி எழுப்பும் வகையில் இருக்கிறது. 

சீதா ராமம் என தலைப்பு வைத்து இந்து முஸ்லீம் காதல் கதையை இயக்குனர் ஹனு கொண்டு சென்ற விதமும் விறுவிறுப்பான திரைக்கதையும் கூடுதல் கவனம் பெற்றுள்ளது. நீண்ட இடைவேளைக்கு பிறகு மிகச்சிறந்த ரொமான்டிக் லவ் ஸ்டோரி பார்த்த மனநிறைவு ஏற்படுகிறது. 

"சீதா ராமம்" படத்திற்கு மதிப்பீடு 4/5

Verdict : "சீதா ராமம்" கதையல்ல ஒரு காதல் காவியம்