சற்று முன்
சினிமா செய்திகள்
நடிகர் சங்கத்திலிருந்து சிம்பு விலகக்கூடாது: டி.ராஜேந்தர்
Updated on : 22 April 2016
தென்னிந்திய நடிகர் சங்கத்திலிருந்து விலகும் முடிவை மறுபரிசீலனை செய்யவேண்டும் என்று நடிகர் சிலம்பரசனுக்கு, அவரது தந்தை டி.ராஜேந்தர் வேண்டுகோள் விடுத்துள்ளார்.
இதுதொடர்பாக அவர் விடுத்துள்ள அறிக்கை:
"எனது மகன் சிம்பு தென்னிந்திய திரைப்பட நடிகர் சங்கத்திலிருந்து விலக இருப்பதாக ஒரு தகவல் வெளியானதற்குப் பின்னால், நடிகர் சங்கத்தின் செயலாளர் விஷால் ஓர் அறிக்கை வெளியிட்டு இருந்தார். அதிலே நடிகர் சங்க தலைவர் நாசர், விஷால், கார்த்தி ஆகியோர் என்னைத் தொடர்பு கொண்டபோது நானும், எனது மகனும் இந்த பீப் சாங்க் விஷயத்தைச் சட்டரீதியாக எதிர்கொள்கிறோம் என்று சொன்னதாக சொல்லியிருந்தார்கள். அது உண்மைதான். நான் சட்டரீதியாக எதிர்கொள்கிறேன் என்று சொன்னேன், சொன்னபடியே இறைவன் அருளால் அத்தனை நீதிமன்றங்களில் ஏறி இறங்கி வழக்குகளையும், வந்த விமரிசனங்கள் அத்தனையையும் சந்தித்தோம். இன்னும் வழக்கு நிலுவையில் உள்ளது.
இந்நிலையில் என் மகன் பீப் சாங்கை வெளியிடவில்லை. யாரோ திருடி வெளியிட்டுவிட்டார்கள் என்பதே உண்மை. அதற்காகதான் வழக்கு மன்றத்திலேயே போராடி கொண்டு இருக்கிறோம். அப்படியிருக்க உண்மை நிலை என்ன என்பதை, உள்நோக்கி ஆராய்ந்து பார்க்காமல் சிம்பு மன்னிப்பு கேட்கவேண்டும் என்று விஷால் ஒரு கருத்து சொன்னது என்ன நியாயம்? செய்யாத தப்புக்கு ஏன் மன்னிப்பு கேட்க வேண்டும் என்பதே எங்கள் வாதம். இந்த வருத்தம் எனக்கும் இருந்தது, என் மகனுக்கு இருந்தது. ஒரு சங்கம் என்று இருந்தால், ஒன்று பாதிக்கப்பட்டவருக்கு உதவி செய்யவேண்டும். இல்லையென்றால் ஒதுங்கிக்கொள்ளவேண்டும். விஷால், எதிர் காலத்திலாவது என் மகன் விஷயத்தில் நடந்து கொண்டதைப் போல, மற்ற உறுப்பினர்கள் ஒருவேளை யாராவது பாதிக்கப்படும் விஷயத்தில் நடந்து கொள்ளாமல் இருப்பதே நல்லது.
என் மகன் சிம்பு, நடிகர் சங்கத்திலிருந்து விலகுகிறேன் என்று அறிவித்தவுடன் என்னையும், என் மகனையும் தொடர்புகொண்டு இந்த முடிவை மறுபரிசீலனை செய்யவேண்டும் என்று எடுத்துச்சொல்லி, எங்கள் மீது அக்கறைக்காட்டிய மூத்த நட்சத்திரங்களுக்கும், கலைஞர்களுக்கும், பத்திரிகையாளர்களுக்கும் நலம் விரும்பிகளுக்கும் என் நன்றியை தெரிவித்துக் கொள்கிறேன். இந்த வேளையில் ஒரு மூத்த கலைஞன் என்ற முறையில் ஒரு கருத்தை மட்டும் பதிவு செய்ய விரும்புகிறேன். என் மகன் சிம்பு ஆனாலும் சரி, யாராக இருந்தாலும் சரி தேர்தலில் வெற்றி பெற அணியினரை மட்டும் பார்க்ககூடாது. மிக குறைந்த வாக்கில் வெற்றி வாய்ப்பை இழந்தாலும் கூட, சிம்புவுக்காக வாக்களித்த அத்தனை நல்ல நெஞ்சங்களையும் எண்ணிப் பார்க்கவேண்டும். எல்லாவற்றுக்கும் மேலாக என் மகனுக்காக தாயுள்ளத்தோடு முன்வந்து, நான் மன்னிப்பு கேட்கிறேன் என்று நல்ல மனதுடன் சொன்ன நடிகர் சங்க தலைவர் நாசரையும் எண்ணிப் பார்க்கவேண்டும். அப்படி நல்ல இதயம் படைத்த நாசரும் நடிகர் சங்கத்தில்தான் இருக்கிறார்.
கடைசியாக ஒன்று, சிம்புவைப் பள்ளிக்கூடத்தில் கொண்டு சேர்த்த தந்தையும் நான்தான். இளம் பருவத்திலேயே நடிகர் சங்கத்திலே சென்று நடிகனாக சேர்த்துவிட்ட கலைஞனும் நான்தான். நடிகர் சங்கத்துக்கு நாம் என்ன செய்தோம் என்பதைத் தான், நாம் எண்ணிப் பார்க்கவேண்டும். நடிகர் சங்கம் நமக்கு என்ன செய்தது என்பதைப் பற்றி நாம் கவலைப்படக் கூடாது. இளம் பருவத்திலிருந்து காலம் தொட்டு இந்நாள் வரை நடிகர் சங்கத்துக்காக சிம்பு, நீ ஆடி இருக்கிறாய், பாடி இருக்கிறாய், ஓடி ஓடி உழைத்திருக்கிறாய், இது வரலாறு. நம்முடைய முன்னோர்கள் மறைந்து விட்ட கலைவாணர், எம்ஜி.ஆர், சிவாஜி கணேசன், எஸ்.எஸ்.ஆர், எம்.ஆர்.ராதா போன்ற எண்ணற்ற தென்னிந்தியக் கலைஞர்கள் கட்டிக் காத்தது நமது தென்னிந்திய நடிகர் சங்கம். அதை விட்டு விலக வேண்டாம், உன் முடிவை மறுபரிசீலனை செய்யவேண்டும் என்பதே உன் தந்தை என்ற முறையில் என் கருத்து. இதற்கு மேல் உனக்கென்று தனிக் கொள்கை இருக்கலாம், சுயமரியாதை உணர்வு இருக்கலாம். அதை நான் மதிக்கிறேன்.
ஈழத்தமிழர் பிரச்னைக்காக மந்திரி பதவிக்கு இணையான மாநில சிறுசேமிப்புத்துறை துணைத்தலைவர் பதவியை ராஜினாமா செய்தவன் நான். ஆனாலும் கடவுள் அருளால் காலம் என்னைப் பக்குவப்படுத்தியிருக்கிறது. அதனால்தான் ஒன்று சொல்கிறேன். வேகத்தை விட விவேகம் தான் வெல்லும்" இவ்வாறு அந்த அறிக்கையில் தெரிவிக்கப்பட்டுள்ளது.
சமீபத்திய செய்திகள்
இலங்கையில் ஜொலிக்கும் வரலட்சுமி சரத்குமார்!
நடிகை வரலட்சுமி சரத்குமார், இலங்கையின் பிரமாண்டமான Cinnamon Life – City of Dreams இடத்தில் நடத்தப்பட்ட போட்டோஷூட்டில் தனக்கே உரிய சீரான அழகையும், தைரியத்தையும் வெளிப்படுத்தியுள்ளார். புகைப்படக் கலைஞர் கேசரா எடுத்த இந்த போட்டோக்கள், 'கருப்பு வெள்ளை' மற்றும் 'பேஸ்டல்' நிறங்களில் வரலட்சுமியின் இயல்பான பிம்பத்தையும், தன்னம்பிக்கையையும் அழகாகப் பதிவு செய்கின்றன.
மெல்லிய நிறங்களில் கட்டமைக்கப்பட்ட ஆடைகளில் தோன்றும் அவர், சினிமாவின் ஆழத்தையும், எக்காலத்திலும் மரையாத ஃபேஷனையும் கலந்து சுமந்திருக்கிறார். “கம்பீரமாக இரு , ஒவ்வொரு புகைப்படமும் ” எனும் அவரது விளக்கம், வெறும் வார்த்தையல்ல – திரைத்துறையிலும், வாழ்க்கையிலும் அவர் கட்டியெடுத்த தனி அடையாளத்தின் பிரதிபலிப்பாகும்.
‘The Verdict’ போன்ற படங்களில் அவரின் அடக்கமும் ஆழமும் கலந்த நடிப்பு பெரிதும் பாராட்டப்பட்டது. பல பரிமாணங்களைக் கொண்ட கதாபாத்திரங்களை தேர்ந்தெடுத்துக் கொண்டு, தன்னிச்சையான தேர்வுகளால் இன்று வரலட்சுமி, தனது தலைமுறையின் மிகவும் தைரியமான நடிகைகளில் ஒருவராக திகழ்கிறார்.
.jpeg)
தற்போது பல்வேறு பருவங்களில் உள்ள திரைப்படங்கள் மூலம், இன்னும் பல உயரங்களை அடையத் தயாராக இருக்கிறார். பாக்ஸ் ஆபிஸ் ஹிட் கதைகளாக இருந்தாலும், உள்ளடக்கம் சார்ந்த படைப்பாக இருந்தாலும் – அவர் தேர்ந்தெடுக்கும் ஒவ்வொரு கதாபாத்திரமும் மனதில் நிற்கும் வகையில் இருக்கும்.
இந்த போட்டோஷூட் வெறும் ஃபேஷனுக்காக மட்டுமல்ல , இது தனது திறமையையும், தன்மையையும் முழுமையாக புரிந்து கொண்ட ஒரு பெண்ணின் ஆளுமையை பதிவு செய்திருக்கும் அழகிய படம்.
- உலக செய்திகள்
- |
- சினிமா
